ҚР Еңбек және халықты әлеуметтік қорғау министрлігі "Шетелдікке немесе азаматтығы жоқ адамға өз бетінше жұмысқа орналасу үшін біліктіліктің сәйкестігі туралы анықтама беру немесе ұзарту" қызметін онлайн режимге ауыстырды, деп хабарлады министрліктің баспасөз қызметі.
Енді шетелдіктер мен азаматтығы жоқ адамдар бұл қызметті әлемнің кез келген жерінен ала алады. Биылғы жылдың 16 маусымынан бастап Халыққа қызмет көрсету орталығына жеке өтініш беру талап етілмейді.
"Шетелдіктерге немесе азаматтығы жоқ адамдарға жұмысқа орналасу үшін анықтама беру бойынша нақты қызметке келетін болсақ, оны egov.kz порталында алу үшін "Азаматтық, көші-қон және иммиграция" бөлімінде қызметтің өзін таңдап, "Онлайн тапсырыс беру" батырмасын басу қажет. Ашылған терезеде міндетті алаңдарды (ЖСН, ТАӘ, Телефон, e-mail) толтыру және білімі туралы, еңбек қызметін растайтын және шетелдіктің жеке басын куәландыратын құжаттардың сканерленген көшірмелерін тіркеу қажет. Содан кейін сұранымға ЭЦҚ немесе бір реттік пароль арқылы қол қою керек", – деп хабарлады ҚР Еңбек және халықты әлеуметтік қорғау вице-министрі Нариман Мұкышев.
Қызмет көрсету мерзімі қажетті құжатқа байланысты 3 күннен 21 күнді құрайды: анықтама беру немесе оны ұзарту.
Естеріңізге сала кетейік, 2020 жылдың соңына дейін министрлік барлық қызметтерін электрондық форматқа көшіруді жоспарлап отыр.
2019 жылдың қорытындысы бойынша электрондық түрде көрсетілетін қызметтер үлесі 80%-ды құрады.
