Фестивальге республиканың әр түкпірінен және шет елдерден, атап айтқанда Моңғолиядан, Венгриядан, Ресейден, Испаниядан, Қытайдан 130-дан астам адам қатысады, деп хабарлайды inbusiness.kz сайтының тілшісі.
ШҚО әкімдігінің мәліметіне сүйенсек, фестиваль10-14 қазан күндері Ұлан ауданы Бозанбай ауылының маңындағы "Бүркіт төбе" алаңында өтеді. Негізгі іс-шаралар 11-12 қазанға жоспарланған.
"Бүркіт төбе" алаңында 20-дан астам киіз үй тігіледі. Онда туристер үшін бүркіттер мен сұңқарлар сайысы ғана емес, түйеге отыру, алтыбақан, садақ ату және басқа да көптеген ойын-сауық ұйымдастырылады.
"Фестиваль қонақтарына өңірдің танымал гастрофирмаларынан тамақтану ұйымдастырылмақ. Жарыс бағдарламасына түрлі санаттағы бүркіттер мен сұңқарлар сайысы, "тазы" тұқымындағы жүйрік иттердің жарысы, "жамбы ату" және "теңге ілу" додалары кіреді", – делінген ақпаратта.
