Шығыс Қазақстанда бес су электр станциясы жаңартылатын энергия көздеріне жатады. Олар: Тишин, Хайрузов, Үлбі, Зайсан және Тұрғысын-1. Бұлардың ішінде соңғы аталғаны 2021 жылы қолданысқа енгізілді, деп хабарлайды inbusiness.kz тілшісі.
Облыстық энергетика және тұрғын үй-коммуналдық шаруашылық басқармасының ақпараты бойынша, алдағы жылдары екі шағын ГЭС салу жоспарда бар.
Біріншісі "Тұрғысын-2" деп аталмақ. Ол Алтай ауданындағы Тұрғысын өзені бойында салынады деп жоспарланған. Қуатттылығы жылына 43,8 МВт болатын шағын станция. Объекті 2027 жылдан кейін іске қосылмақ.
"Осы жобаны іске асыру мақсатында "Тұрғұсын-2" ЖШС техникалық-экономикалық негіздеме әзірлеп жатыр, "KEGOC" АҚ-ның келісімін алу үшін қуат беру схемасы жолданған", деп жазылған облыс әкімдігінің ақпаратында.
Сондай-ақ Энергетика министрлігінің 2021 жылғы қарашада өткізген аукциондық сауда-саттық қорытындысы бойынша, Катонқарағай ауданында қуаты 1,4 МВт болатын шағын ГЭС салу жоспарлануда. Аукцион жеңімпазы "Еуропа Солар" ЖШС. Қазір жер учаскесін ресімдеу жұмыстары жүргізілуде.
