ШҚО-да тасқыннан зардап шеккендер баспаналы болып жатыр. Бұл туралы egemen.kz хабарлайды.
Арнайы құрылған комиссия 152 үйдің 13-ін тұруға жарамсыз деп таныған болатын. Қазіргі уақытта ауданда тұруға жарамды 134 үйге жөндеу жұмыстары жүргізіліп жатыр. Ал баспанасы жарамсыз деп танылған үй иелеріне облыс басшылығы жаңадан үй сатып алып береміз деп уәде берген еді.
Жақында "Нұр Отан" партиясы облыстық филиалы төрағасының бірінші орынбасары Әнуарбек Мұхтарханов Шемонаиха ауданына арнайы барып, 12 отбасына баспана кілтін тапсырды.
Партия филиалының баспасөз қызметінің хабарлауынша, бұл күні Шемонаиха тұрғындарына тек пәтер кілтін ғана емес, Астанадан арнайы келген "Мемлекеттік қызмет көрсету саласындағы қызметкерлердің жергілікті кәсіптік одағы" қоғамдық бірлестігінің төрағасы бірнеше тұрмыстық техниканы тарту етті. Олар өздерімен бірге 18 тоңазытқыш, 7 кір жуатын машина, 8 теледидар алып келді.
"Ауданда жөндеу жұмыстары қызу жүріп жатыр. Тамыздың аяғына дейін 126 үйдегі жөндеу толық аяқталады. Жұмыс барысы толық бақылауда. Аудандық әкімдіктің алдына қойылған міндет бар. Сондықтан тасқыннан зардап шеккен халықты қалыпты тіршілігіне оралту күн тәртібіндегі басты мәселе", - дейді "Нұр Отан" партиясының облыстық филиалы төрағасының бірінші орынбасары Әнуарбек Мұхтарханов.
