Өскеменде Мемлекеттік кірістер департаменті мен Экономикалық тергеу департаментінің қызметкерлері заңсыз алкоголь өндірушілерді анықтады, деп хабарлайды inbusiness.kz Мемлекеттік кірістер комитетіне сілтеме жасап.
Антисанитариялық жағдайда күшті спирттік ішімдіктерді дайындап келген цехтан 2 145 дана "Түркістан" коньягы, 12 945 дана коньяк бұйымдары, 620 дана "ОША" арағы, 4 000 дана бос шыны бөтелкелер ыдысы, 15 000 дана арақ қалпақшалары, 2 дана қақпақтарды мөрлеуге арналған құрылғы, сорғы мен шлангтарға қосылған 500 литрден астам спирт сұйықтығы бар пластикалық ыдыс табылды.
Бұл іс ҚР Қылмыстық кодексінің 233-бабы бойынша сотқа дейінгі тергеп-тексерудің бірыңғай тізілімінде тіркелді. Сондай-ақ ҚР ӘҚБтК-нің 463-ші бабы бойынша әкімшілік іс қозғалған.
