"Шығыс Қазақстан облысының өзендерінде су деңгейінің күрт көтерілуі күтіледі. 30 наурызда басталған және 5 сәуірге дейін жалғасуы күтіліп отырған ұзақ жауын-шашынға және ауа температурасының жоғарылауына байланысты ШҚО-дағы өзендердің суы күрт көтеріледі және мұз кептелістері қалыптасады деп болжануда", – деп мәлім етті бүгін Қазақстанның Ұлттық гидрометеорологиялық қызметі.
"Қазгидромет" сондай-ақ 1 сәуірге арналған "Қауіпті метеорологиялық құбылыстарға болжамын" да жария етті.
"Қазақстанның басым аумағында атмосфералық фронттың өтуіне байланысты жауын-шашын, оңтүстіктің кей жерлерінде қатты жауын-шашын жауады. Тек батыста ауа райы жауын-шашынсыз болады. Кей жерлерде тұман, желдің күшеюі, оңтүстікте найзағай, дауыл күтіледі, бұршақ болуы ықтимал", – делінген онда.
Ауа райы жорамалына жүгінсек, Жамбыл облысының кей жерінде желдің күші 15-20, екпіні 23-28, тіпті 30 метр/секундқа дейін баратын күшті дауылдар тұрмақ.
Түркістан облысының кей жерінде найзағай ойнайды, бұршақ болуы ықтимал, желдің жылдамдығы 15-20, түнде екпіні 23-28 м/с-ке дейін күшеюі мүмкін.
Қызылорда облысының кей жерлерінде тұман, найзағай, дауыл, бұршақ болуы ықтимал, түнде жел 15-20, екпіні 25, күндіз кей жерлерінде 15-20 м/с-ке дейін жетпек.
Солтүстік Қазақстан облысының кей жерінде түнде желдің күші 15-20, күндіз 15-20, екпіні 23 м/с-ке дейін күшеймек. Алматы облысының кей жерінде жел секундына 15-20 метр қарқынмен соғады деп болжануда.
Қазір Ақмола және Қарағанды облыстарына да үлкен су келуде.
