Бұл мәселені сенатор Ольга Булавкина өзінің депутаттық сауалында көтерді, деп хабарлайды inbusiness.kz сайты.
Қазіргі таңда ШҚО-дан Алматыға дейін бір ғана пойыз жүреді. Оның жол жүру уақыты – 27 сағат.
"Жолаушылардың қауіпсіздігі мен ыңғайлы қозғалыстың барлық талабына жауап беретін, жолда 16 сағат жүретін тальго пойызы Алматы-Өскемен бағыты бойынша 2022 жылдың қыркүйегіне дейін қатынады. Бірақ "Жолаушылар тасымалы" АҚ ақпаратына сәйкес, бұл бағыт тиімсіз болуына байланысты жабылып қалған. Бұл халық үшінм қолайсыз жағдай мен бей-берекет билет тапшылығы мәселесін туғызды. Республикалық трассаның жөнделуіне, сондай-ақ қыс мезгіліндегі ауа-райының қолайсыздығына байланысты Алматымен автомобиль қатынасы да қиын екенін атап өтуіміз қажет", - деді Сенат депутаты.
Бұдан бөлек Ольга Булавкина Риддер тұрғындарының теміржол жоқтығынан Ресейдің шекаралас аймақтары – Алтай өлкесі және Новосібір облысымен қатынаса алмай отырғанын жеткізді.
Сенатор Алматыға дейінгі жүйрік теміржол бағытын қалпына келтіру мәселесін қарауды, сондай-ақ Ресеймен мемлекетаралық деңгейде теміржолдағы жолаушылар қатынасын жолға қою мәселесін шешуге көмек көрсетуді сұрады.
