Жаздың ыстық күндері жағажайда демалушылар қатары қалың болады. Сондықтан суда қауіпсіз демалу үшін тиісті ережелерді сақтау қажет.
Бұл туралы онлайн-брифингте Астана ТЖД Азаматтық қорғаныс басқармасының бастығы Азамат Құсайынов айтып берді, деп хабарлайды inbusiness.kz Астана қаласы әкімдігінің баспасөз қызметіне сілтеме жасап.
"Бүгінде елордалық ТЖД шомылу маусымының ашылуына дайындықты белсенді жүргізуде. Шомылу маусымы кезеңінде азаматтардың қауіпсіздігін қамтамасыз ету мақсатында Астана қаласының әкімі "Шомылу маусымы кезеңінде Астана қаласы тұрғындарының қауіпсіздігін қамтамасыз ету жөніндегі іс-шаралар жоспарын" әзірлеп, бекітті. Аудан әкімдіктерімен бірлесіп су айдындарында 10-нан астам ақпараттық стенд және шомылуға тыйым салынған жерлерде 100 тыйым салу қауіпсіздік белгісі орнатылды", – деді спикер.
Құтқарушылар акциялар, конкурстар, интерактивті сабақтар арқылы судағы қауіпсіздік ережелері туралы мектеп оқушылары мен балабақша тәрбиеленушілеріне баяндайды.
Биыл Астанада шомылуға арналған 4 орын белгіленді: Орталық жағажай, "Три пескаря" демалыс аймағы, "Астаналық аула" және Ш.Бейсекова көшесіндегі көпір маңындағы коммуналдық жағажай. Су айдындарының рұқсат етілген және тыйым салынған учаскелерінің тізбесі "2gis" платформасында орналастырылған. Судағы қауіпсіздікті қамтамасыз ету және төтенше жағдайлар қаупі төнген немесе туындаған кезде тиімді шешімдер қабылдау мақсатында шомылуға тыйым салатын 21 учаскеде қосымша бейнебақылау камералары орнатылды.
"Шомылу кезеңінде күнделікті патрульдеуге 50 сүңгуір құтқарушы, 15 бірлік сүңгуірлік жарақтары бар жедел-құтқару техникасы, 6 бірлік жүзу құралдары тартылатын болады. Шомылу маусымы жыл сайын 1 маусымда ашылады. Арнайы жабдықталған орындарда: жағажайларда, бассейндерде және құтқарушылар патрульдейтін орындарда шомылған дұрыс", - деп қосты Азамат Құсайынов.
Астана қаласы ТЖД ескертеді:
Жүзу үшін жүзбеңіз, мас күйінде шомылмаңыз, балаларды су объектілерінің жанында қараусыз қалдырмаңыз, су қоймаларының жанында және таныс емес жерлерде шомылмаңыз немесе суға түспеңіз. Шомылуға арналмаған заттарды пайдалануға болмайды (автомобиль камералары, пенопласт, пластикалық бөтелкелер және т.б.).
