Шри-Ланканың әскери күштері наразылық шарасы кезінде қару қолданғанын мойындады, бірақ ереуілшілерге зиян тигізгісі келмегенін мәлім етті, деп хабарлайды inbusiness.kz жергілікті БАҚ-қа сілтеме жасап.
Наразылықтар кезіндегі атыс түсірілген бейнероликтер әлеуметтік желіде тарап кеткеннен кейін, әскерилер осындай мәлімдеме жасады.
Әскери шенеуніктер наразылық шарасы кезінде ескерту ретінде бірнеше рет оқ атылғанын айтты.
9 шілдеде мыңдаған адам Шри-Ланка астанасы Коломбо көшелеріне шығып президент Готабая Раджапаксаның отставкаға кетуін талап еткен болатын. Ереуіл кезінде кем дегенде 40 адам зардап шекті. Бас көтергендер қоршауды бұзып, оның резиденциясының аумағына баса-көктеп кірген болатын. Раджапакса қашуға мәжбүр болды. Ол 13 шілдеде отставкаға кететінін мәлім етті.
Сәуір айында Шри-Ланка экономикалық дағдарысқа тап болды. Коронавирустық пандемия салдарынан елге келетін туристердің саны азайып, шетел валютасының тапшылығы орнады. Шри-Ланка отынды сатып алу үшін төлем жүргізе алмай қалды.
Табиғат Нұрболат
Фото: afp.com
