Облыстық төтенше жағдайлар департаменті баспасөз қызметінің мәліметінше, бірінші өрт Құлжа мемлекеттік табиғи қорық аумағында тіркелген. Онда құрғақ шөп пен бұталар жанып жатыр. Өрт шыққан аумақ шамамен – 100 гектар.
Екінші өрт Ақбұлақ орман шаруашылығында тіркелді. Өрттің аумағы – 50 гектар.
Мамандар құм төбелер, жел және жақын маңда судың болмауы өртті сөндіру қиындық туғызып отырғанын айтады.
"Өрт шыққан жерде МИ-8 тікұшақтары ұшып жүр. Әуеден су жеткізу ұйымдастырылды. Өртті сөндіруге "Қазавиаорманкүзеті" десанты, жергілікті орман шаруашылықтарының қызметкерлері мен құтқарушылар жұмылдырылды. Шұғыл қызметтердің жұмысын қатты жел қиындатып жатыр", – деп жазылған хабарламада.
Жалынды сөндіруге төтенше жағдайлар департаменті, жергілікті атқарушы орган мен орман шаруашылықтарының күші жұмылдырылды (149 қызметкер, 28 техника).
Төтенше жағдайлар департаменті елді мекендерге өрт қаупі төнбейтінін атап өтті.
