Шығыс Қазақстан облысының полицейлері ҰОС ардагері Құрмат Рахимовтың ауласында шеру өткізді, деп хабарлайды inbusiness.kz сайты Polisia.kz-ке сілтеме жасап.
Ақпаратқа сәйкес, Өскемен қаласында майдангер тұратын үйдің ауласында соғыс жылдарындағы әндер шырқалды. ШҚО полиция департаментінің хоры халықтың сүйікті әндеріне айналған “Катюша”, “Журавли” және “День победы” әндерін орындады.
ШҚО ІІО және ҰҰ ардагерлер кеңесінің төрағасы Нұрлыбек Үдербаев, тәртіп сақшылары мен кадеттер Ұлы Отан соғысының және ішкі істер органдарының ардагері Құрмат Рахимовқа барып, оған арнап мерекелік іс-шара ұйымдастырды.
Ақсақал биыл 100 жылдық мерейтойын тойлап жатқанына қарамастан, әлі де жайдары, қайратты, белсенді, көңілді. Ер адам құттықтауларды әдеттегідей өзіне деген талапшылдықпен қабылдады.
Хор солистері соғыс жылдарындағы әндерді орындады, әр музыкалық нөмірде полицейлер ардагерге мерекелік көңіл-күй сыйлауға тырысты. Барлығы салтанатты түрде, оркестрдің сүйемелдеуімен өтті. Шеру ардагерді ғана емес, көршілерді де қуантты. Адамдар терезелерден қарап, мерекеден толық ләззат алу үшін сыртқа шықты.
Жақында Астана қаласында ақсақал Мемлекет Басшысы Қасым-Жомарт Тоқаевтың атынан “Құрмет” орденімен мемлекеттік наградаға ие болғанын атап өткен жөн. Оны Қазақстан Республикасының ішкі істер министрі Ержан Саденов салтанатты түрде табыс етті.
Құрмат Рахимов 17 жасында майданға аттанған. Ардагердің жауынгерлік жолы – Беларусь, Литва, Польшаның бүкіл картасын қамтиды, бірақ жас жігіт көптен күткен жеңісін Берлинде қарсы алды. Соғыстан кейін ол Каменец-Подольскідегі әскери училищені бітіріп, Түркіменстан мен Иран, Қазақстан-Қытай, кеңес-жапон және басқа шекаралардағы шекара бөлімдерінде қызмет еткен.
Демобилизациядан кейін 1965 жылы Өскеменге келіп, ұзақ жылдар бойы облыстық ІІБ бастығының орынбасары қызметін атқарған. 1981 жылы ішкі істер органдарында 16 жыл жұмыс істегеннен кейін зейнетке шыққан, алайда бүгінгі күнге дейін өз ісіне адал болып қала береді. Осы жылдар ішінде ол 6 генерал мен 60 офицерді тәрбиелеген. Ұлы Отан соғысы және ІІО ардагері II дәрежелі Отан соғысы орденімен, “Кенигсбергті алғаны үшін”, “Германияны жеңгені үшін”, “Жауынгерлік еңбегі үшін” медалімен және басқа да мерейтойлық наградалармен марапатталған.
Ақсақал Отан қорғау жолында өмірлік кәсібін таңдаған жандарды әрқашан қолдауға және ақыл-кеңесін беруге дайын.
Шерудің соңғы аккорды “Катюша” әні және полиция қызметкерлері мен кадеттердің салтанатты шеруі болды. Жауынгерлердің ерлігі, жанқиярлығы мен қаһармандығы әрқайсымыздың жүрегімізде мәңгі сақталады.
