Облыстағы елді мекендердің 16 пайызы ғана 4G байланысымен қамтылған. Қалған елді мекендерде интернет жылдамдығы баяу.
Бұл туралы ҚР Цифрлық даму, инновация және аэроғарыш өнеркәсібі вице-министрі Асхат Оразбек өңір жұртшылығымен кездескенде мәлім етті.
Ресми деректерге сүйенсек, облыстағы 363 елді мекеннің 129-ында интернет жылдамдығы баяу. Ауылдардың жартысынан көбі 3G байланысымен қамтылған.
- Бұл ауылдардың тұрғындары WhatsApp мессенджерін пайдалана алады. Бірақ ұялы телефонда интернеттің жылдамдығы өте төмен, - дейді Асхат Оразбек.
Оның айтуынша, 234 елді мекенде сымды интернет жоқ. Осы мәселені шешу үшін бірқатар шара қолға алынбақ.
- ШҚО-ны байланыспен қамту бойынша пилоттық аймаққа айналдырғымыз келеді. Бұл мақсатта қалалар мен ауылдарға бірнеше рет сапар жасадық. "Қолжетімді интернет" жаңа ұлттық бағдарламасы аясында тиісті жұмыстар жүргізіледі. Облыс әкімдігі де антенна-матчталық құрылғыларды салуға қаржы бөліп отыр, - дейді ҚР Цифрлық даму, инновация және аэроғарыш өнеркәсібі вице-министрі.
Осы орайда айта кететіні, интернет жылдамдығының баяулығы тек ауылдарда ғана емес, Өскемен қаласындағы Аль-Фараби даңғылының бойында орналасқан тұрғын үйлерде де нашар. Тұрғындар осы мәселе бойынша жиі шағымданады.
