Шығыс Қазақстан облысында бірнеше күннен бері жаяу бұрқасын соғып, көлік қозғалысына айтарлықтай қиындық туғызды. Облыстық төтенше жағдайлар қызметінің құтқарушылары боранда қалған 5 адам эвакуациялады.
ШҚО төтенше жағдайлар департаменті баспасөз қызметінің мәліметіне сүйенсек, 21 желтоқсанда сағат 23.35 шамасында Ұлан ауданындағы Бозанбай және Ақжартас ауылдарының арасында "УАЗ Патриот" автокөлігінде отырған 5 адам боранда қалған.
- Олар құтқарушыларға хабарласып, көмек сұрады. Оқиға орнына келген Ұлан ауданының №13 өрт сөндіру бекетінің қызметкерлері 5 адамды жақын маңдағы Бозанбай ауылына жеткізді. Азаматтар онда тұратын туыстарының үйлеріне орналасты, - делінген ақпаратта.
Айта кетейік, ТЖД аймақтағы қатты жел мен боран туралы өңір жұртшылығына алдын ала ескерткен болатын. Құтқарушылар халықтан қолайсыз ауа-райында елді мекендерден тыс жерлерге бармауды сұрайды.
