ШҚО Төтенше жағдайлар департаменті баспасөз қызметінің мәліметіне сүйенсек, қазіргі таңда облыс аумағының 61%-ын қар алып жатыр.
"Өңірде дауылды ескерту жарияланды. Болжам бойынша жауын-шашын мол жауады. Қар белсенді еріп жатқандықтан өзен-көлдерде су деңгейі көтерілуі мүмкін. Облыстағы су қоймалары тәулік бойы бақылауда", - делінген ақпаратта.
Құтқарушылар қауіпті аймақтарда тұратын тұрғындарға су тасқыны кезінде өзін-өзі ұстау ережелері бойынша нұсқаулық беруде.
"Риддер, Шемонаиха қалалары, Катонқарағай, Марқакөл, Глубокое, Үлкен Нарын және Алтай аудандарында су тасқыны қаупі бар. Алтай ауданында профилактикалық жұмыстарға ҚР Төтенше жағдайлар министрлігіне қарасты №68303 әскери бөлімінің қызметшілері тартылды. Жалпы су тасқыны болуы мүмкін аумақтарды қоса алғанда, барлық ықтимал қауіптер картасы әзірленген", - делінген хабарламада.
Еске сала кетейік, бұған дейін Шығыс Қазақстан облысында мұз астына түсіп кеткен екі балықшы құтқарылғанын хабарлаған едік.
