Өрт Әйтеке би көшесінде орналасқан құрылыс дүкендерінің бірінде болды, бірақ көп ұзамай көрші дүкендерге тарады. Бұл туралы inbusiness.kz сайты Шымкент қалалық Төтенше жағдайлар департаментіне сілтеме жасап хабарлайды.
"17 қаңтар күні сағат 01.14-те Әйтеке би №1/3 мекенжайында 1300 шаршы метр алаңда дүкендер мен оларға салынған "ЕВРОЛЮКС", "Гармония", "Медина", "Марварит" және "Әйгерім" қойма үй-жайлары жанып кетті. Өрт салдарынан 130 шаршы метр аумақта "Медина" және "Евролюкс" дүкендерінің шатыр үй-жайлары жартылай құлады", – деп түсіндірді Шымкент қалалық Төтенше жағдайлар департаментінің баспасөз қызметі.
Ресми мәліметке сәйкес, ірі өртті сөндіруге 233 адам мен 45 арнайы техника жұмылдырылды. Өрт сөндірушілердің күшімен өрт 03.07-де оқшауланып, сағат 04.51-де толығымен сөндірілді.
"Зардап шеккендер мен қаза тапқандар жоқ. Өрттің алдын ала себебі – қысқа тұйықталу", – деп толықтырды Төтенше жағдайлар департаментінің баспасөз қызметі.
