"ПетроҚазақстан Ойл Продактс" ЖШС-ның мұнай өңдеудің жаңа технологиялық желісіндегі маңызды бөлігі – шикізатты алдын ала гидротазалау блогы бар изомеризация қондырғысының құрылысы аяқталуға жақын қалды. Бүгінгі күні жобаның 95%-нан астамы орындалды. Соның ішінде: 4500-ден артық сызба әзірленді (100%), құрылыс алаңына жабдықтың 149 бірлігінің 147-сі жеткізілді, 142 бірлігі монтаждалды. Іргестастардың 9344 текше метрі бетондалды (92,2%), металл конструкцияларын монтаждау 100%-ға орындалды, құбырларды монтаждау аяқталып қалды (99,6%). Бұл туралы "ҚМГ ӨМ" АҚ баспасөз қызметі хабарлады.
Бұл ретте изомеризацияны іске қосу үшін жалпызауыттық шаруашылықтың нысандарының құрылысы жүріп жатыр. Оның 84 %-дан артығы орындалды.
Пайдалануға тапсыру 2017 жылдың маусым айына жоспарланған.
Айта кетейік, изомеризация қондырғысы Кеден одағының техникалық регламентіне сәйкес келетін К4, К5 экологиялық класты бензиннің жоғары октанды құрамдауыштарын шығаруға арналған.
