Бүгін Оңтүстік Қазақстан облысының әкімі Жансейіт Түймебаев мемлекеттік қызмет және мәдениет саласында еңбек етіп жүрген 90 қызметкерге пәтер кілтін салтанатты түрде табыстады. Бұл пәтерлер сала мамандарына қызметтік міндеттерін атқару кезеңінде пайдалануы үшін беріліп отыр, деп хабарлайды облыс әкімінің баспасөз қызметі.
Игі шара барысында облыс әкімі Елбасымыздың жолдауында міндеттелген тапсырмалар аясында алдағы жылдары да халықты тұрғын үймен қамтамасыз ету жұмыстары жалғасатынын жеткізді.
"Ел Тәуелсіздігінің 25 жылдығын мерекелеу аясында жаңа пәтерге қол жеткізіп отырсыздар. Осы сәт сіздердің өмірлеріңіздің жарқын кезеңі болсын. Жаңа жылда жаңа қоныстарыңыз жайлы да, берекелі болуына шын жүректен тілектеспін", – деді облыс әкімі.
Шымкенттегі әкімшілік-іскерлік орталығында орналасқан 5 қабатты 2 тұрғын үйдің жалпы ауданы 6024 шаршы метрді құрайды. Облыс бюджетінен 717,5 млн теңге бағытталған тұрғын үйдің құрылысын "ҚазмедеоГранд" ЖШС жүргізген.
Айта кетейік, былтырғы жылы облыста мемлекеттік және бюджеттік сала мамандарына 51 қызметтік пәтер берілді. Сондай-ақ, 2015-2016 жылдары Шымкентте "Өңірлерді дамытудың 2020 жылға дейінгі" және "Нұрлы жол" мемлекеттік бағдарламалары аясында 80 тұрғын үй пайдалануға беріліп, 5420 отбасы қоныс тойын тойлады.
