Жалған есепке алу-бақылау маркалары жабыстырылған өнімдер дайындаумен айналысатын орынды Шымкент қалалық Экономикалық тергеу департаментінің қызметкерлері жүргізген жедел-іздестіру шаралары барысында анықтаған. Дайындалған алкоголь өнімдерінің қаладағы азық-түлік дүкендерінде сатылып келіпті.
Тексеру барысында 18 түрлі алкоголь өнімдерінің 6671 бөтелкесі, 15 тонна спирт, 67 есепке алу-бақылау маркалары, сұйықтықтарды араластыратын сорғы, алкоголь өнімдеріне арналған 146 бос қорап және 750 бос бөтелке, 500-ден астам қақпақшалар мен 40 625 теңге ақша қаражаты анықталып, тәркіленіп алынған.
"Қазіргі таңда жасырын цех қызметі толығымен тоқтатылды.
Аталған дерек бойынша Қылмыстық кодекстің 233-бабының 2-бөлігімен сотқа дейінгі тергеп-тексеру ісі басталды (көрінеу жалған есепке алу-бақылау маркаларын қолдану және өткізу).
Қазіргі уақытта, қылмыстық іс шеңберінде осы іске қатысы бар барлық тұлғалар анықталды, тиісті сараптамалар мен тергеу амалдары жүргізілуде" делінген қалалық Экономикалық тергеу департаментіндегілер.
Жансая Тәуекелқызы
