Қалалық денсаулық басқармасы баспасөз қызметінің мәліметінше, кеше 10 сәуір күні қаладағы саябақтардың бірінен 103 қызметіне ер адамның биіктен құлап кеткені туралы шақырту түскен. Оқиға орнына жеткен жедел жәрдем қызметкерлері 20 жастағы жігіттің ауыр жарақат алғанын анықтаған.
"Оқиға орнына барған жедел жәрдем қызметкерлері науқасқа алғашқы медициналық көмек көрсетіп, №1 қалалық клиникалық ауруханаға жеткізді. Медициналық тексеру барысында пациенттің бас сүйек маңдайы жарақаттанғаны анықталып, операция жасалды. Науқастың жағдайы ауыр, жансақтау бөлімінде жатыр", – делінген басқарманың хабарламасында.
Қазір оқиғаның мән-жайын қалалық полиция қызметкерлері анықтап жатыр.
"Бәйдібек би көшесіндегі атракциондар саябағындағы жайт бойынша әл-Фараби ауданы полиция басқармасының қызметкерлері ҚР ҚК 306-бабының 1-бөлігімен қылмыстық іс тіркеді. Қазіргі таңда сотқа дейінгі тергеп-тексеру жұмыстары жүріп жатыр. Оның барысында жайттың бүкіл егжей-тегжейі анықталады", – деп жазылған полицияның баспасөз қызметі таратқан хабарламада.
