Шымкентте боран және көктайғақ салдарынан облыстық маңызы бар жолдар жабылды, деп хабарлайды inbusiness.kz.
Қалалық төтенше жағдайлар департаменті ауа райының қолайсыздығына байланысты тұрғындарды алыс жолға шықпауға шақырады.
"Биыл 6 ақпан кешкі сағат 21.40-ден бастап Бәйдібек ауданындағы 77-152 шақырым жолдың "Қошқарата-Жарықбас-Бірлік" ШҚ-1 бөлігінің 4 шақырым учаскесі барлық көлік үшін жабылды.
Сондай-ақ Түркістан облысы Созақ және Бәйдібек аудандарында облыстық маңызы бар жолдың 577-642 шақырымы ШҚ-2 "Ұланбел-Созақ-Екпінді" жол учаскесі, "Шолаққорған-Шаян" учаскесінде барлық көлік үшін жабылды. Республикалық маңызы бар М-32 "Самара-Шымкент" тас жолының 2057-2080 шақырымында (Қызылорда облысының шекарасы – Түркістан облысы Шорнақ ауылы) барлық көлік үшін жол жабылды", – деп жазылған басқарма таратқан хабарламада.
Биыл 7 ақпан түскі сағат 13:00-ден бастап жол қозғалысына шектеу енгізілген. Сонымен қатар Шымкентте толассыз жаңбырдан бірнеше ауданды су басты. 4 аудандағы көшелер мен аулаларды судан тазартуға 150-ге жуық адам, 50-ден аса техника және 30 мотопомпа тартылған.
"Су басқан аудандардың аумағынан ТЖ департаменті мен Шымкент қаласының жергілікті атқарушы органдарының күшімен 975 текше метр су сорылды", – деп жазылған департамент таратқан хабарламада.
