Шымкенттегі барлық мешітте 28 маусым, таңғы сағат 6.30-да "Айт намазы" оқылады. Мереке күні қалада бекітілген мал сою орындарында сағат 08:00-ден бастап құрбандық шалу дәстүрі жүзеге асырылады, деп хабарлайды inbusiness.kz.
Қала аумағында мал союға арналған 3 орын да Қаратау ауданында орналасқан. Мәселен, "Замин" мал сою бекеті Сайрам тұрғын алабына қарасты А-Темур көшесінде болса, "Халал Қассаб" мал сою бекеті Бозарық - 3 тұрғын алабында жұмыс істейді. Ал "Байтерек Агро" мал сою бекетінің мекенжайы Сайрам тұрғын алабына қарасты Махмут ата көшесі №72 учаскесінде орналасқан.
"Құрбандыққа шалатын малдың құлақ жапсырмалары болуы керек. Ауыл шаруашылығы жануарларын бірдейлендіру орындарында тіркеуде болуы тиіс. Құрбандық малының №1 нысанды ветеринариялық анықтамасы міндеттеліп, тек бекітілген орындарда сойылуы қажет. Сонымен қатар алынған етті балалар үйіне, балабақшаға, ауруханаға, мешіттерге өткізген жағдайда №2 нысанды ветеринариялық анықтамасы болуы керек. Тасымалдау барысында арнайы температуралық режимі сақталған көлікпен тасымалдануы тиіс", - делінген Шымкент қаласы әкімдігінің баспасөз қызметі таратқан ақпаратта.
Сондай-ақ қала тұрғындары онлайн режимде құрбандық шалуға мүмкіндігі бар. Бұл бағытта құрбан шалу рәсімін қашықтан өткізуге арналған qurban2023.kz сайты жұмыс істейді.
