Шымкентте қызылша ауруы дендеп тұр. Жаңартылған мәліметтерге сәйкес, 3683 адам бұл ауруға шалдыққан. Оның ішінде 86%-ы – 14 жасқа дейінгі балалар. 1 қыркүйектен бастап қаладағы 86 мектеп пен 89 балабақшада қызылша анықталды, деп жазады inbusiness.kz.
Санитариялық-эпидемиологиялық бақылау департаментінің бөлім бастығы Жанаргүл Жақсылықова 2 мың жағдай зертханалық тұрғыдан расталғанын, қалғаны бойынша талдау жүргізіліп жатқанын баса айтты. Оның сөзінше, аурудың өршуінің басты себебіне екпеден бас тарту жатады.
"Қызылшаға қарсы екпе алудан бас тартқандар – 50%. Науқастардың жартысы – вакцинациядан өтпегендер. Олардың ішінде екпе алуға жатпайтын бір жасқа дейінгі балалар да бар. Ауруға шалдыққандардың 3 мыңы – 14 жасқа дейінгі балалар. Дертті алдын алудың ең тиімді шарасына вакцинация жатады. Қызылшаның қазіргі жағдайын өршу деуге болады", - деді ол.
Жанаргүл Жақсылықова ұқсас жағдай 2018-2019 жылдары болғанын, бұл кезде бар болғаны 3 мың жағдай анықталғанын жеткізді.
"Пандемия кезінде қызылша жағдайы мүлдем тіркелмеген, ал биыл өсім байқалып отыр", - деді департаменттің бөлім басшысы.
