Оны өңірлерде өткізу туралы шешім қабылданды. Бұл туралы Оқу-ағарту вице-министрі Шолпан Қаринова өзінің Facebook парақшасында хабарлады.
Оның сөзінше, штаб мүшелерімен олимпиаданың қорытынды кезеңінің салтанатты жабылу рәсімін жұмыс тәртібіне ауыстыру туралы шешім қабылданған.
“Қазіргі уақытта министрліктің барлық құрылымдық бөлімдері мән-жайды анықтау және олимпиаданы одан әрі өткізу бойынша кешенді жұмыстарды жалғастыруда. Бұл жағдай Оқу-ағарту министрінің жеке бақылауында”, - деп атап өтті ол.
Жаратылыстану-математикалық бағыттағы пәндер бойынша республикалық олимпиадаға барлығы 891 оқушы қатысып, бақ сынауда. Вице-министрдің хабарлауынша, олимпиада Ережеге және бекітілген жоспарға сәйкес өткізіліп жатыр.
“Олимпиада барысында 14 қатысушының дене қызуы көтеріліп, ішек-асқазан сырқаты, сондай-ақ, бір оқушының денесі бөртіп, "желшешек" диагнозының белгілері байқалды. Ұйымдастырушылармен дер кезінде тиісті шұғыл шаралар қабылданған. Аталған оқушыларға шұғыл жедел-жәрдем көмегі шақырылып, Шымкент қаласының жұқпалы аурулар ауруханасына жатқызылды. Балалардың хал-жағдайымен танысу үшін қала емханасының басшылығымен сөйлесіп отырмын. Қазіргі уақытта балалардың жағдайы қалыпты, тиісті ем қабылдауда”, - деп жазды Шолпан Қаринова.
Ол ведомствоның басты міндеті балалардың қауіпсіздігін қамтамасыз ету екенін жеткізді.
“Балалардың қауіпсіздігі қатаң бақылауға алынып, мектеп оқушылары орналасқан жерлерде тиісті санитарлық шаралар ұйымдастырылды. Шымкент қаласының санитарлық-эпидемиологиялық қызметі жағдайдың туындау себептерін анықтау бойынша барлық қажетті шараларды қабылдауда. Денсаулық сақтау басқармасымен, санитарлық-эпидемиялогиялық бақылау департаментімен келісе отырып, балалардың тамақтану орны қалалық мектеп-гимназия асханасына ауыстырылды”, - деді вице-министр.
Еске салайық, осыған дейін Шымкентке олимпиадаға келіп, уланып қалған 14 оқушы дәрігерлердің бақылауында екенін жазған болатынбыз.
