Ашылу рәсіміне Қазақстан Республикасының Төтенше жағдайлар министрі генерал-лейтенант Шыңғыс Әрінов, Шымкент қаласы әкімінің орынбасары Берік Беркімбаев, азаматтық қорғау органдарының ардагерлері және бейінді қызметтердің өкілдері қатысты.
Жаңа орталық қаладағы осындай төртінші нысан болып табылады. Алғашқы үш кешен Шымкентте жарты жылдан астам уақыттан бері жұмыс істеп, жедел қызметтердің бірлескен іс-қимылының тиімділігін көрсетті. Бөлімшелердің бір жерде орналасуы оқыс оқиғалар кезінде әрекеттерді тез үйлестіруге және шақыртуларға жету уақытын азайтуға мүмкіндік береді.
Кешен құрамында №12 өрт сөндіру бөлімі, учаскелік полиция пункті және жедел медициналық жәрдем базасы ашылды. Қызметкерлер үшін қызметтік кабинеттер, оқу сыныбы, газ-түтіннен қорғау қызметінің бекеті, асхана, оқу мұнарасы және спорт алаңы жабдықталған. Арнайы техникаға арналған гараж және шатырлар қарастырылған. Бөлімшелердің қызмет көрсету аймағына Бозарық шағын ауданындағы 17 мыңнан астам тұрғын кіреді.
Жаңа кешен Шымкент қаласы әкімдігінің қолдауымен салынды. Ашылу барысында күн сайын қала тұрғындарының қауіпсіздігін қамтамасыз етіп жүрген жедел қызмет қызметкерлерінің еңбегі атап өтілді. Жобаны іске асыру бөлімшелердің шақыртуларға жету уақытын азайтуға және жедел әрекет ету тиімділігін арттыруға мүмкіндік береді.
