Шымкет қаласында орналасқан шұлық тоқитын фабрика жылына 16 млн жұп өнім шығарады.
Сонымен қатар кәсіпорын 1 мыңнан аса бұйым түрлерін жасай алады. Индустрия және инфрақұрылымдық даму министрлігінің хабарлауынша Alemsocks сауда маркасымен танылған өнімдер Қазақстанның, сондай-ақ ЕАЭО және Еуропа елдерінің тұтыну нарығына шығарылған.
"Оңтүстік Кореядан сатып алынған заманауи технологиялық жабдықтарды пайдалану, өндірісте жұмыс істейтін қызметкерлердің еңбек өнімділігін ынталандыру – отандық және шетелдік нарықта жоғары сұранысқа ие сапалы шұлық өнімдерін шығаруға мүмкіндік береді. Зауыт өндірістің толық жабық циклін қамтиды: бастапқы шикізатты өңдеуден бастап дайын өнімді шығаруға дейін. Технологиялық жабдықтың 250-ге жуық бірлігі 24/7 режимінде тапсырыстарды орындайды", – деп хабарлады министрлік.
Кәсіпорын 2015 жылдың желтоқсанында Индустрияландыру картасы аясында пайдалануға берілді. Жалпы фабрикаға құйылған инвестиция көлемі 1 млрд 800 млн теңгені құрайды. Өндіріс ошағында 250 адам тұрақты жұмыс орындарымен қамтамасыз етілді.
Құралай Құдайберген
