Депутат Дәулет Мұқаев Мәжілісте өткен Үкімет сағатында өрт сөндірушілердің мәселесін көтерді, деп хабарлайды inbusiness.kz сайты.
"Қостанай, Семейде орман өрті болған кезде біз қайырымдылық қорымен 4 млн-ға жуық ақша халықтан жинап, өрт сөндірушілерге майка, аяқ киім әпердік, тіпті тамағына дейін алып берген жағдай болды. Нәскиге дейін алдық. Бюджеттен ақша бөлінеді. Өрт сөндірушілер жатып өрт сөндірді. Жер деген ыстық, қонышы ұзын бәтеңкенің өзі ыстыққа қайта-қайта еріп кетіп жатты. Сондай жағдайда неге аяқ киім қарастырылмаған? Бұл бірінші мәселе. Одан кейін олардың мектептің еденінде жатқан суреттері келді. Мен оны әлеуметтік желіге салған кезде не болды? Өрт сөндірушінің әйелі жіберген, ол "өшіріңізші, күйеуімді жұмыста қыспаққа алып жатыр" деп айтты. Бізде неге шындықты айтатын адамдар үнемі сондай қыспақта жүруі керек? Өлім мен өмір арасында жүрген жандардан жиі келетін сұрақтың бірі тұрғын үй төлемі, айлық мәселесіне қатысты. Өздеріңізге белгілі, оларға ешқандай төлем жоқ. Осындай байлығы бар елде майка, берцы, нәски алу деген нонсенс", - деді Дәулет Мұқаев.
Экология және табиғи ресурстар министрінің дерегінше, орман саласына өртке арналған 4405 дана арнайы киім-кешек қажет.
"Соған байланысты 918 млн ақша бөлінді. Бүгін алғанымыз бар-жоғы 2 мың. Себебі конкурстардың қиындығына байланысты 515 млн-ды ғана игердік, қалғанын қайтарып бердік. Биылғы көктемде түзетулерге сәйкес қалған 2400-ін аламыз деп жоспарлап отырмыз. Бір-екі жылда толығымен бәрін қамтамасыз етеміз. Тұрғын үй төлеміне келсек, біздің өрт сөндірушілерге белгіленбеген. Бірақ өрт болған кезде күнделікті арнайы азық бөлінеді", - деп қысқа қайырды Ерлан Нысанбаев
