Қазақстан мен Қытай арасында ортақ шешімін таппаған мәселе жоқ. Бүгін Ақордада елімізге ресми сапармен келген ҚХР Төрағасы Си Цзиньпинмен шағын және кеңейтілген құрамдағы келіссөздерден кейінгі бірлескен мәлімдеме барысында Елбасы Нұрсұлтан Назарбаев осылай мәлім етті, деп хабарлайды ҚазАқпарат.
"Елімізге ресми сапармен келген ҚХР Төрағасы Си Цзиньпин мырзамен бүгін Астанада келіссөздер жүргізіп, кездескенімізге өте қуаныштымыз. Бұл кездесу Қазақстан мен Қытай арасындағы дипломатиялық қарым-қатынастың 25 жылдық мерекесіне сай келіп отыр. Осындай аз ғана кезеңнің ішінде саяси ықпалдастығымыз тек қана өрлеу бағытында. Шынын айтқанда, екі арадағы қарым-қатынас ең төменгі көрсеткіштен жоғары көрсеткішке дейін өсті, өркендеді. Әртүрлі жағдайдағы басқосуларда өзара белсенді қимыл жүргізіп келеміз. Бүгінде елдеріміздің экономикалық ынтымақтастығы дамып, жоғарылай түсуде. Арамызда ортақ шешімін таппаған мәселелер жоқ. Екі мемлекеттің арасындағы қатынастар тиімді серіктестіктің дүниедегі үлгісі болып табылады", - деді Нұрсұлтан Назарбаев.
Мемлекет басшысы шағын және кеңейтілген құрамда қытайлық әріптесімен мазмұнды келіссөздер жүргізгенін, барлық маңызды мәселелерде өзара түсіністікке қол жеткізгендіктерін баса айтты.
"Біз елдеріміздің ШЫҰ аясындағы өзара іс-қимылының жоғары деңгейін атап өттік. ҚХР Төрағасының бұл идеясы осы жерде, Назарбаев Университетінде алғаш рет жария етілген еді. Астана саммитінен кейін ШЫҰ-ға төрағалық Қазақстаннан Қытайға өтеді. Бұл оқиға ұйым үшін маңызды сәтте орын алуда. Ертең мүшелер құрамы екі маңызды мүшемен толығады. Олар: Үндістан және Пәкістан. Осылайша, ШЫҰ жер тұрғындарының 40 пайызын, әлем экономикасының шамамен үштен бірін қамтитын болады. Сондықтан өзіміздің төрағалығымызды Қытайға бере отырып, қытайлық достарымызға табыстар тілейміз", - деді Қазақстан Президенті.
