Еуропалық Одақ елдері 2025 жылдың қыркүйегінде Украинадан келген азаматтарға уақытша қорғаныс беру туралы 80 мыңға жуық жаңа шешім қабылдаған, деп хабарлайды inbusiness.kz сайты.
Аталған көрсеткіш алдыңғы аймен салыстырғанда 49%-ға жоғары және 2023 жылдың тамызынан бергі ең жоғары деңгейді көрсеткен.
Әлбетте, миграцияның артуы Украина билігінің 18-22 жас аралығындағы ер азаматтарға елден шығуға уақытша рұқсат беруімен байланысты болды. Сол себепті қыркүйекте Украинадан кеткен ерлердің үлесі (47%) алғаш рет әйелдерден асып кетті. Әйелдер үлесі 31% болса, кәмелетке толмағандар 22%-ды құрады.
Осы кезде ЕО аумағында 4,3 миллион украин азаматы уақытша қорғаныс мәртебесіне ие болған.
Босқындардың көбі Германияға (1,2 миллионнан аса адам, жалпы санның – 28,3%-ы) тұрақтаған. Одан кейінгі орында Польша (1 миллион, 23,5%) және Чехия (шамамен 400 мың, 9%) тұр.
Сарапшылар бұл тенденцияны Украинадағы соғыс жағдайының ұзаққа созылғанымен байланыстырады. Мұнан бөлек, жастар арасындағы қауіпсіздік пен әлеуметтік тұрақтылыққа деген алаңдаушылықтың күшейгенін де байқатса керек-ті.
Айта кетейік, Еуропалық Одақ 2022 жылдан бері Украина азаматтарына "уақытша қорғау директивасы" аясында тұруға, еңбек етуге және әлеуметтік қызметтерге қол жеткізуге мүмкіндік беруде.
