Түркиядағы ауа сапасы соңғы 5 жылда орта есеппен 16 пайызға жақсарды. Бұл туралы Түркияның қоршаған орта, урбанизация және климаттық өзгерістер министрлігі хабарлады.
Елде атмосфералық ауаның, судың және топырақтың сапасын өлшейтін 365 станция бар. Станциялардан алынған деректер Гөлбашы ауданында орналасқан үздіксіз мониторинг орталығына және қоршаған ортаға әсерді бағалау, рұқсаттар және инспекциялар басқармасына жіберіледі.
Түркияда ауа сапасын бақылау 2004 жылдан бері жүргізіліп келеді. 2005 жылы SO2 және PM10 параметрлері әртүрлі провинциялардағы ауа сапасын өлшеу бойынша 36 станцияда бақыланды. Одан кейінгі жылдары CO, NOx, O3 және PM2.5 мониторингі жүргізілді.
Түркияның ауа сапасын жақсартуға бағытталған әрекеті деректерге оң әсер етті. Мұнда соңғы 5 жылда ауа сапасы туралы мәліметтерді талдау нәтижесінде елдегі ауа сапасы орта есеппен 16 пайызға жақсарғаны анықталды, оның ішінде қатты бөлшектер 4 пайызға, күкірт диоксиді 46 пайызға, көмірқышқыл газы 18 пайызға, азот диоксиді 3 пайызға, озон 8 пайызға жақсарды.
Түркиядағы ауа сапасы деректерімен "www.havaizleme.gov.tr" веб-сайты және ауа сапасын бақылау ұлттық желісінің мобильді қосымшасы арқылы танысуға болады.
