Созақ ауданының кәсіпкерлері түйе сүтін өңдеп, дамытудың жаңа жолын тапты, деп хабарлайды облыс әкімінің баспасөз қызметі.
Аудан орталығы – Шолаққорған ауылындағы "Аруана" ауыл шаруашылығы өндірістік коорперативі осынау кәсіп түрімен айналысып жүрген бірден-бір кәсіпорын. Кооператив түйе сүтінен бөлек, сиыр сүтін де қабылдайды.
Бүгінде төрт түрлі ағарған – шұбат, сиыр сүті, айран, қаймақ әзірлеп, жергілікті дүкендерге жөнелтіп жүрген серіктестік таяуда сүттен йогурт пен кілегей әзірлеп, саудалауды қолға алмақшы. Бұл туралы күнгейдегі БАҚ өкілдерінің Созақ ауданына жасаған пресс-туры барысында белгілі болды.
"Алғашқы кезде 500 литрге лайықталған жұмыс істедік. Қазір шұбат өңдеу мүмкіндігі тәулігіне 1 тоннаға жетіп отыр. Ісімізді осылайша жолға қойып келеміз. Таяуда аудандағы уран өндіретін кәсіпорындармен ондағы әрбір жұмысшы басына 0,5 литрден шұбат жеткізіп отыруға келістік", – дейді "Аруана" өндірістік коорперативінің төрағасы Жанболат Әдишов.
Жалпы түйе сүтін өңдеу цехы орналасатын ғимаратты дайындап, жөндеу жұмысы мен сүт өңдейтін құрылғыны алу үшін кооператив жетекшілігі "ЫРЫС" МҚҰ" ЖШС-дан 12 млн теңге несие алған. Бүгінде жұмысын жандандырып жатқан ұжымшар алдағы уақытта түйе сүтін өңдеу үлесін арттыру арқылы күніне оның тәуліктік қуатын 5 тоннаға дейін жеткізіп, істі әрі қарай дөңгелетуді жоспарлап қойған.
Айта кетейік, Созақ ауданында бүгінгі күні 10 мыңға жуық түйе бар.
