Шетел азаматтарының АҚШ аумағына кіруі бойынша жаңа ережелер бекітілді, деп хабарлайды inbusiness.kz.
Қазақстанның Сыртқы істер министрлігіне дипломатиялық арналар арқылы келіп түскен ақпаратқа сәйкес, 2021 жылғы 8 қарашадан бастап АҚШ-тың Азық-түлік пен дәрі-дәрмектердің сапасы бойынша санитарлық қадағалау басқарамасы COVID-19-ға қарсы ДДҰ мақұлдаған препараттармен вакцинацияланған және соны растайтын сертификаты (паспорты) бар адамдарға ғана АҚШ аумағына кіруге рұқсат етті.
Бекітілген тізімде:
- Pfizer-BioNTech;
- Moderna;
- Johnson&Johnson;
- AstraZeneca;
- Covishield;
- BIBP/Sinopharm;
- Sinovac сияқты вакциналар бар.
"Осыған байланысты, аталған сертификаттар вакцинацияға жауапты мемлекеттік орган бекіткен нұсқа бойынша рәсімделуі тиіс. Бұл құжаттардың түпнұсқалығын авиакомпания қызметкерлері АҚШ-қа ұшқанға дейін тіркеу кезінде тексереді", – деп жазылған Қазақстанның Сыртқы істер министрлігі таратқан хабарламада.
Айта кететіні, жаңа талаптар 18 жасқа дейінгі балаларға, вакцинациялауға құжатпен қарсы көрсетілімдері бар адамдарға, сондай-ақ дипломатиялық, қызметтік және транзиттік санаттағы визалары бар мемлекеттік қызметшілерге немесе олардың отбасы мүшелеріне және халықаралық ұйымдардың қызметкерлеріне қолданылмайды.
