Степногорск қаласында ер адам 87 жастағы зейнеткерді алдау арқылы үйіне кіріп, жарты млн теңгесін қолды қылған, деп жазады inbusiness.kz Polisia.kz-ке сілтеме жасап.
Қалалық полиция басқармасына зейнеткердің қызы анасын белгісіз ер адамның тонап кеткенін хабарлаған. Оқиға 21 тамыз кешкі сағат 18.00-де болған. Күдікті өзін қызмет көрсететін компания қызметкері ретінде таныстырып, жалғыз тұратын зейнеткердің үйіне кірген. Әжейден қарызға 2 мың теңге беруін өтініп, көз алдында барлық жинағын шығарған қарияның ақшасын алып, қашып кеткен.
"Жедел-іздестіру шаралары барысында Степногорск полицейлері күдіктінің тұлғасын анықтады. Ол бұрын ұрлық үшін қылмыстық жауапкершілікке тартылған, жақын маңдағы ауылдың 35 жастағы тұрғыны болып шықты", - деп жазылған хабарламада.
Аталған факті бойынша Степногорск қаласының полиция басқармасы ҚР ҚК 191-бабының 1-бөлігі (Тонау) бойынша сотқа дейінгі тергеуді бастады.
