Степногорск қаласында ерлікпен қаза тапқан елордалық өрт сөндіруші Асқар Забикулинге арналған мурал пайда болды, деп жазады inbusiness.kz Ақмола облыстық ТЖД баспасөз қызметіне сілтеме жасап.
Арт нысан қаладағы 3-МӨСБ ғимаратының алдыңғы жағында орналасқан.
Ақпаратқа сәйкес, батыр құтқарушының портретін қалалық ТЖД және жергілікті атқарушы органдардың бастамасы бойынша алматылық "AW_borders" компаниясы орындаған. Жұмысты орындауға суретші Абылайхан Сүлейменовке 10 күндей уақыт кеткен.
Қалалық ТЖБ бастығы Ержан Қаппасовтың айтуынша, мурал батырдың құрметіне әрі 19 қазан – Құтқарушылар күніне орайластырылды.
"Асқардың ерлігін бүкіл Қазақстан біледі. Бұл мурал бізге, сондай-ақ оның қыздарына қалған мұралардың бірі. Оның ерлігін ұмытпағандарыңыз үшін көп рақмет. Қолдау көрсеткендері үшін қала әкімдігіне алғысымды білдіремін", - деді Асқар Забикулиннің ағасы Эльдар Забикулин.
