/img/tv1.svg
RU KZ
Студенттер Арал тұрғындарына көмектесуде

Студенттер Арал тұрғындарына көмектесуде

Елордалық студенттер Арал теңізін 363 келі қоқыстан тазартты.   

24 Қыркүйек 2020 19:57 219

Студенттер Арал тұрғындарына көмектесуде

Олар балықшылардан қалған пластикалық ауларды теңіз түбінен «Зәкір мысық» деп аталатын арнайы құрылғымен алып шыққан. KAZGUU Университеті белсенді жастарының  бұл жобасы Қазақстанның  әлеуметтік кәсіпкерлер фестивалінде ерекше аталып өтілді.

«Біз әлемді жақсартқымыз келеді және қазіргі экологиялық проблемаларды шешуде креативті тәсілдер ұсынып жүрміз. Мемлекет Басшысы Қасым-Жомарт Тоқаев белгілегендей, елімізге волонтерлік қозғалыс керек. Арал теңізі мәселесі біздің заманымыздың ең маңызды экологиялық проблемаларының бірі. Алғашқыда Арал теңізінің тартылғанын білетін бірақ, өз көзімен көрмеген команда мүшелері болды. Бәріміз жергілікті халқымен танысып, теңізді жақыннан көргенде ерекше әсер алдық», – деп атап өтті команда капитаны Динара Кеулімжанова.

Арал қаласының тұрғындарын қолдау мақсатында жастар тағы бір жоба ұсынған болатын. Ол үйлерді жылытуға арналған отын брикеттерінің өндірісі. Брикеттер үшін Арал теңізі маңындағы қамысты пайдаланған екен.   «Экологиялық отын түрі көмірқышқыл газын бөлмейді. Көмірмен салыстырғанда, ұзақ жанып, күлі ғана қалып қояды және бағасы да арзандау», – дейді Динара Кеулімжанова.

Студенттер бұл игі істермен шектелген жоқ.  Форумдар мен конференциялардан қалған ескі баннерлерге екінші өмір сыйлап отыр. Керексіз баннерлерден Аралдық балықшылар үшін сапалы алжапқыш тігу жұмысын жолға қойды.  Нәтижесінде «Аналар үйіндегі» әйелдер жұмыспен қамтылды.

Волонтерлік қызметтің әр сағаты үшін қанша төленеді

Төлем көлемі республикалық бюджетке енгізілген.

13 Желтоқсан 2019 17:16 784

ҚР Ақпарат және қоғамдық даму министрлігінің Жастар және отбасы істері комитетінің төрағасы Мадияр Қожахмет Қазақстанда волонтерлікті қолдау бағытындағы ауқымды жұмыстардың жоспарымен бөлісті, деп хабарлайды ҚазАқпарат.

«Волонтерлер жылына байланысты жалпы еріктілер жұмысына деген қызығушылықты арттыру жоспарланған. Біршама ұсыныс та түсіп жатыр. Атап айтқанда, биыл «Әлеуметтік студенттік несие» атты жобасын бастадық. Ол бойынша студент жастарға волонтерлік қызметтің әр сағаты үшін 1 000 теңгеден төленеді. Олар осы соманы оқу қажеттілігіне жұмсап, базалық шығындарын өтей алады», – деді Мадияр Қожахмет ОКҚ-да өткен баспасөз мәслихатында.

Оның айтуынша, волонтерлік қызметтің әр сағаты үшін төленетін қаражат республикалық бюджетке енгізіліп қойған.

«Оператор – Білім және ғылым министрлігі. Qazvolunteer.kz сайты бар. Аталған сайтта волонтерлік қызмет көрсетуге ниеті бар жастар тіркеледі. Қазір ЖОО студенттері тіркеліп жатыр. Бірақ, келесі жылы процесске колледж студенттері де тартылар деген үміттеміз», – деді ол.

Комитет төрағасының айтуына қарағанда, бұдан бұрын айтылғандай, волонтерлік қызмет мерзімін еңбек кітапшасына енгізу жұмысы да пысықталу үстінде.

«Бұл – Еуропа елдерінде кеңінен таралған тәжірибе. Дамыған елдерде белсенді волонтерлік қызмет – қосымша басымдыққа ие. Сонымен бірге, Мемлекет басшысы өз сөзінде волонтерлікті дамытудың жеті бағытын атаған еді. Осы бағыттар аясында арнайы жобалар жасалады. Мәселен, «Қамқорлық» жобасы аясында Жеңістің 75 жылдығы қарсаңында волонтерлерді ескерткіштерді қалпына келтіру ісіне тарту көзделген. Бұған қоса архивтерді цифрландыру ісінің маңызы алға шықты. Бұл бағытта да волонтерлер тобы жасақталады», – деді ол.

Мадияр Қожахмет өз сөзінде ресейлік мамандардың қатысуымен волонтерліктің халықаралық кеңесі құрылғанын айтып өтті.

«Жұмыс бағыттарын айқындап алу үшін ресейлік әріптестермен ауқымды үш кездесу ұйымдастырмақпыз. Осыдан 2 жыл бұрын Ресейде «Еріктілер жылы» өткен болатын», - деді ол.

Еске сала кетсек, Жастар жылының жабылу және Волонтер жылының ашылу салтанатында Мемлекет басшысы Қасым-Жомарт Тоқаев волонтерлік жұмыстардың негізгі бағыттарын атаған болатын. Өз кезегінде ҚР Ақпарат және қоғамдық даму министрі Дәурен Абаев Қазақстан өңірлерінде волонтерлікті қолдауға арналған орталықтар ашылатынын хабарлаған еді.

 

2020 жылдан бастап студенттердің шәкіртақысы өседі

Осылайша 200 мыңға жуық студенттің материалдық жағдайы сәл де болса оңалмақ.

10 Желтоқсан 2019 12:44 2150

Бұл туралы ҚР Президенті Қасым-Жомарт Тоқаев мәлім етті, деп хабарлайды inbusiness.kz.

Айта кететін жайт, шәкіртақы 2016 жылдан бері көтерілмеген екен.

«Студенттерді қолдау мақсатында, 2020 жылдың 1 қаңтарынан бастап бакалавриат, магистратура және докторантура студенттерінің шәкіртақысын 25%-ға көтеру туралы шешім қабылдадым. Жалпы, олардың саны қазір 130 мыңды құрайды», – деді Тоқаев Жастар жылының жабылу салтанатында.

Оның айтуынша, колледж студенттерінің де шәкіртақысы көтеріледі.

«Осы жылдың қыркүйегінде жұмысшы мамандығында оқып жүрген 122 мың адамның шәкіртақысы 30%-ға өсті. Менің тапсырмам бойынша, 2020 жылдың қаңтар айынан бастап колледж студенттері шәкіртақылары да 25%-ға артады. Олардың саны 100 мың адамды құрайды»,– деп түйіндеді сөзін Қасым-Жомарт Тоқаев.