Энергетика министрі Алмасадам Сәтқалиев су тасқыны қиын өңірлерде электрмен жабдықтауды қалпына келтіру жұмыстары туралы айтты, деп хабарлайды inbusiness.kz сайты.
"Қостанай облысында электрмен жабдықтаудан ажыратылған абоненттер саны 5 мыңнан 700-ге дейін қысқарды. Ақтөбе облысында – 5,5 мыңнан 13 абонентке дейін, Батыс Қазақстан және Ақмола облыстарында шектеу қойылған абоненттер саны 4 есеге, ал Атырау облысында 3 есеге қысқарды. Солтүстік Қазақстан облысы бойынша авариялық-қалпына келтіру жұмыстары жүргізіліп жатыр. Қалған 5 мың абонентті электрмен жабдықтау су деңгейі төмендегеннен кейін қалпына келтіріледі", - деді ведомство басшысы.
Алмасадам Сәтқалиевтің дерегінше, төтенше жағдайды жоюға 9 мыңнан астам энергетик мамандары, 2 145 бірлік арнайы автотехника қатысып жатыр. Электр энергиясының 414 мобильді көзі бар.
"Алдағы кезеңде кернеудің әртүрлі кластарындағы 3 мыңнан астам электр желілерінің тіректерін қалпына келтіру қажет. Салдарды жою үшін барлық қажетті материалдар бар", - деп атап өтті Энергетика министрі.
