Бұл туралы Қызылорда облысының әкімі Орталық коммуникациялар қызметінің брифингінде айтты, деп хабарлайды inbusiness.kz сайты.
Мемлекет басшысының Қазақстан халқына арнаған Жолдауынан туындайтын негізгі міндеттердің бірі – отандық және шетелдік инвестицияларды тарту. Биыл өңір жоспарланған 517,5 млрд теңге меженің 478,3 млрд теңгесіне 10 айда қол жеткізіп отыр.
– Атап өту қажет, өңірге бекітілген индикатор соңғы екі жыл қатарынан артығымен орындалуда. 2022 жылы 373,5 млрд теңге индикатор белгіленген еді, атқарылған жұмыстар нәтижесінде жоспар 10,6%-ға артығымен орындалып, 413,3 млрд теңге болды. Ал, өткен жылы 424,2 млрд теңге индикатор бекітіліп, жоспар 21%-ға артығымен орындалды, яғни 513,7 млрд теңге инвестиция тартылды, – деді Н.Нәлібаев.
Қызылорда көрсеткіштің өсу қарқыны, жоспарлы көрсеткіштің орындалуы бойынша өңірлер арасында І орынға шыққан. Өнеркәсіп саласының дамуына серпін берген шыны зауыты арқылы өндіріске 42 млрд теңге инвестиция тартылды. Қажетті шикізаттар шетелден, әсіресе Ресейден, Өзбекстаннан тасымалдануда. Зауыт іске қосылғаннан бері 37,1 млрд теңгенің 28,7 млн шаршы метр шынысын өндірді. Өнімнің 70%-ы ішкі нарыққа, 30%-ы Өзбекстан, Қырғызстан, Тәжікстан, Грузияға және Ресейге экспортқа жіберілген. Қазіргі таңда зауытта 400-ге жуық адам жұмыс істеуде.
Инвестиция тарту, өндірістік кооперацияны дамыту, жаңа жобаларды іске асыру үшін шетелдік компания басшылары, дипломатия өкілдері облысқа жұмыс сапарымен келіп, кездесулер ұйымдастыруда. Аймақта инвесторларға қолайлы климат қалыптасты деп айтуға толық негіз бар.
Сыр өңірінде жүзеге асырылған ірі инвестициялық жобалар қатарында "Болат Өтемұратов қорының" демеушілігімен салынған "Қорқыт ата әуежайының" жаңа терминалы бар. "Акса Энерджи" түрік компаниясының инвестициясына қуаттылығы 240 мегаваттық жаңа жылу-электр орталығының құрылысы қарқынды жүріп жатыр.
