Сырдария өзені арқылы Шардара су қоймасынан Қызылорда облысына секундына 500 текше метрге жуық су жіберіліп жатыр, деп хабарлайды inbusiness.kz сайты.
Жиналған су жазда ауылшаруашылық қажеттіліктеріне пайдаланылады. Сол себепті Су ресурстары және ирригация министрлігінің мамандары су дипломатиясы бойынша қарқынды жұмыс жүргізіп жатыр.
Су ресурстары және ирригация министрі Нұржан Нұржігітовтің тапсырмасы бойынша Су ресурстарын реттеу, қорғау және пайдалану комитетінің төрағасы Сейілбек Нұрымбетов Қызылорда облысының су шаруашылығы нысандарын аралады.
Комитет төрағасы Сырдария өзенінде сең жүру барысын бақылап, көктем айларында су қабылдауға дайындық жұмыстарын тексерді.
Қызылорда қаласындағы КОПЭС саяжайы тұсында Сырдария өзенінің оң жағалауындағы қорғаныс бөгетінің 80 метрлік бөлігін бекіту жұмыстары аяқталды.
Бұдан бөлек, "Қос бөгет" қорғаныс бөгетінің зақымдалған 1300 метр бөлігі, "Самит арна" және "Шөмен қайыры" учаскелерінің аралығындағы 3855 метр қорғаныс бөгетінің зақымдалған жерлері қалпына келтіріп, топырақпен нығайтылды.
Сондай-ақ, Сейілбек Нұрымбетов Қызылорда су торабының жұмысымен де танысты.
Нысан Қызылорда қаласы және Сырдария, Жалағаш, Қармақшы аудандары аумағындағы 120 мың гектар суармалы егістікті және 250 мың гектар шабындық пен жайылымдық жерлерді сумен қамтамасыз етеді.
"Қызылорда облысы аумағында су шаруашылығы жағдайы тұрақты. Арал-Сырдария бассейндік инспекциясы мен жергілікті "Қазсушар" филиалының мамандары жағдайды сағат сайын бақылауда ұстайды", – деді Су ресурстарын реттеу, қорғау және пайдалану комитетінің төрағасы Сейілбек Нұрымбетов.
Айта кетейік, Шардара қоймасына су Орталық Азия елдерімен белсенді ынтымақтастық пен келісімдердің нәтижесінде жиналады.
