Сингапур Республикасына алғашқы ресми сапары шеңберінде Қазақстан Республикасы Премьер-Министрінің орынбасары – Сыртқы істер министрі Мұхтар Тілеуберді Сингапур Республикасының Сыртқы істер министрі Вивиан Балакришнанмен және Еңбек ресурстары министрі, Екінші сауда және өнеркәсіп министрі Тан Си Ленгпен келіссөздер жүргізді, деп хабарлайды inbusiness.kz СІМ баспасөз қызметіне сілтеме жасап.
Қазақстандық делегация құрамына Индустрия және инфрақұрылымдық даму министрі Қайырбек Өскенбаев, "Астана" Халықаралық қаржы орталығының басқарушысы Қайрат Келімбетов, "Қазақстан темір жолы" ҰК" АҚ Басқарма төрағасы Нұрлан Сауранбаев және "Kazakh Invest" ҰК" АҚ төрағасы Мейіржан Юсупов кірді.
Сингапур СІМ басшысымен келіссөздер барысында тараптар екіжақты ынтымақтастықтың кең ауқымды мәселелерін талқылады.
Атап айтқанда, жоғары деңгейдегі сапарлар кестесі айқындалды және сауда-экономикалық, инвестициялық көлік-логистикалық және мәдени-гуманитарлық өзара іс-қимылды одан әрі нығайту перспективалары қаралды. Қазақстан мен Сингапурдың Еуразия мен Оңтүстік-Шығыс Азияның транзит-логистикалық хабы ретіндегі рөліне ерекше назар аударылды.
"Сингапур Қазақстанның Оңтүстік-Шығыс Азиядағы басты саяси серіктестерінің бірі. Үш онжылдық ішінде біз сенімді саяси диалог пен маңызды экономикалық және мәдени байланыстар орнаттық", – деді М.Тілеуберді.
Қазақстан мен Сингапур басты халықаралық мәселелерге ортақ және жақын көзқарастарға ие деп қосты ҚР СІМ басшысы.
Халықаралық ұйымдарда бір-бірінің өзара қолдауы атап өтілді. Сондай-ақ халықаралық күн тәртібіндегі кең ауқымды мәселелер бойынша пікір алмасылды.
Министрлер алдағы жылы Қазақстан мен Сингапур арасындағы дипломатиялық қатынастардың 30 жылдық мерейтойының маңыздылығын атап өтіп, осы мерейтойды мерекелеу жөніндегі бірлескен іс-қимыл жоспарын талқылады.
Екіжақты сауда-экономикалық ынтымақтастық, сондай-ақ шарт-құқықтық базаны кеңейту мәселелері Министр Тан Си Ленгпен кездесудің негізгі тақырыбына айналды. Тараптар елдер арасындағы инфрақұрылым және логистика, ауыл шаруашылығы, жаңартылатын энергия көздері, жоғары технологиялық өндіріс және басқа салалардағы экономикалық өзара іс-қимылды тереңдету және кеңейту үшін қолда бар әлеуетті атап өтті.
Тараптар екі ел арасындағы тауар айналымы артуының оң трендін атап өтті, осылайша 2021 жылы ол 1 млрд астам АҚШ долларын құрады және биыл 3 есе өсім күтілуде. Ағымдағы жылдың бірінші жартысында ғана екіжақты сауда көлемі 926 млн АҚШ долларға жетті.
Бұдан басқа, Министр М.Тілеуберді "Kazakhstan - Singapore Business Council" Қазақстан-Сингапур іскерлік кеңестің ресми іске қосылуына байланысты салтанатты іс-шараға қатысты. Құрамына CPG International, Kusto Group, ZNC Enviroventures және басқа да ірі компаниялар кірген бұл бизнес-қауымдастық екі ел арасындағы сауда мен инвестицияларға, іскер топтардың екіжақты іскерлік ынтымақтастығының байланыстырушы буыны мен катализаторын құруға жәрдемдесуге арналған.
Екі ел Елшіліктерінің қолдауымен кеңестің іскерлік қызметі сауда мен инвестицияларды ғана емес, туризм мен басқа да бастамаларды ілгерілетуге және дамытуды кеңейтуге бағытталатын болады.
