Талдықорғандық Андрей Ермилов пен Александр Дадочкин квадрокоптер құрастырып, оны 300 мың теңгеге сатты, деп хабарлайды ҚазАқпарат.
Жетісулық техниктердің бұл туындысы егіс алқаптарын, бау-бақшаларды дәрілеуде, іздестіру жұмыстарында және геологиялық барлауда таптырмас құрал. Ұшу аппаратының артықшылығы ауыр салмақ көтеруге қауқарлы. Мәселен, олардың 300 мың теңгеге сатылып кеткен квадрокоптері 10 кг зат алып ұша алады. Өнертапқыштар техникалық көрсеткіштері қазіргі қолданыстағы квадрокоптерлерден еш кем емес дейді. Сондықтан бұл ұшу аппараттарын тұрмысқа кеңінен пайдалануға болатынын айтады. Іскер азаматтар бұл жобаларын "Даму" қорының "Жаңа бизнесті ашуға қолдау" бағдарламасы аясында жүзеге асырды. Әзірше тек екі нұсқасын сынақтан өткізген техниктер қаржылай қолдау тапса басқа түрлерін де құрастыруға ниетті. Қазіргі таңда шеберлер өз еңбектерін патенттеп алуды жоспарлап отыр.
