Алматы облысы Талғар ауданының жедел жәрдем дәрігерлері жүрегі тоқтап қалған науқасты ажалдан арашалап қалды, деп хабарлайды inbusiness.kz сайтының тілшісі.
Талғар ауданындағы 17/20 бригадасы шақыртуға шықты. Науқастың үйіне 10 минутта жеткен жедел жәрдем қызметкерлері ес-түссіз жатқан зейнеткерге бірден медициналық көмек көрсетті.
"78 жастағы әжей есінен танып құлаған. Мен келсем науқастың ұлы анасының өкпесін басып, жүрек массажын жасап жатыр екен. Тамырдың соғуын ұйқы артериясынан ұстап қарасам соқпай тұр. Дереу хаттама бойынша алғашқы көмек көрсетуге кірістім" – дейді 17/20 бригадасының фельдшері Жанар Кенжебекова.
Медициналық шаралардан кейін ағзаның өмірлік функциялары қайта қалпына келген. Көп ұзамай жасы 80-ге таяп қалған әжей көзін ашып, өзі демала бастады.
Қосымша тағы 17/6 бригадасы шақыртылып, науқас Талғар орталық аудандық ауруханасына жеткізілді.
