Әкімдіктің мәліметінше, қазіргі таңда стадионды жаңғырту тек инвестиция тарту арқылы жүзеге асырылмақ.
– Стадионның қазіргі техникалық жағдайын ескере отырып, оны 39 жыл мерзімге сенімгерлік басқаруға беру ұсынылды. Бұл – сатып алу құқығынсыз, уақытша шара. Ол қолданыстағы заңнама талаптарына толық сәйкес келеді. Бұл тәсіл бюджет шығындарын азайтып, жеке инвестиция есебінен спорттық әрі мәдени инфрақұрылымды дамытуға мүмкіндік береді, – делінген әкімдік хабарламасында.
Ведомство өкілдері стадионның сатылатыны немесе жекеменшікке өтетіні туралы ақпаратты жалған және негізсіз деп атады.
– Бұл мәселе бойынша 2025 жылдың 15 наурызы, 5 сәуірі және 5 мамыры күндері Қарасай батыр көшесіндегі №6 мектепте қоғамдық тыңдаулар өтті. Оған тұрғындармен қатар мемлекеттік орган өкілдері, инвесторлар және қоғам белсенділері қатысты. Қазіргі уақытта пікірлер мен ұсыныстар жинақталып жатыр. Қабылданатын барлық шешімдер ашық әрі жария түрде қабылданады, – деп мәлімдеді әкімдік.
Айта кетейік, бұған дейін Талғар тұрғындары қаладағы жалғыз қолжетімді спорт нысаны саналатын "Жастар" стадионын жекеге беруге қарсы шығып, бейнеүндеу жасаған болатын.
