Елге белгілі суретші, график, ҚазКСР Еңбек сіңірген өнер қайраткері, Қазақстан Суретшілер одағының мүшесі, Көркемөнер академиясының академигі, TURKSOI ұйымының "Тұран" сыйлығының иегері Қайырбай Зәкіров мәңгілік мекеніне аттанды, деп жазады inbusiness.kz сайты.
Суретші 1945 жылы Қызылорда облысы, Арал ауданында дүниеге келген. 1968 жылы Н.В.Гоголь атындағы Алматы көркемсурет училищесін, Абай атындағы қазақ педагогикалық институтының көркем-графикалық факультетін бітірген. 1976 жылдан КСРО Суретшілер одағының, кейін Қазақстан Суретшілер одағының мүшесі. 1992-1995 жылдар аралығында Қорқыт ата атындағы Қызылорда педагогикалық институтының бейнелеу өнері кафедрасының меңгерушісі болды. 1988 жылы ҚазКСР Еңбек сіңірген өнер қайраткері атағын иеленді.
Қылқалам иесінің шығармашылық тақырыптары уақытпен, ежелгі әдет-ғұрып салт-санамен, бабалардың рухани сабақтастығымен, экологиялық мәселелерімен тығыз байланысты. Оның өнері интеллектуалды-философиялық көп қырлылығымен ерекшеленді. Суретші этностық негіздегі рухани этикаға әсері тиген көшпенділер өміріндегі әлеуметтік өзгеріске аса мән берді.
Шығармашылық туындылары Ә.Қастеев атындағы Мемлекеттік өнер музейінде, әр елдердегі дербес коллекциялар мен галереяларда сақталған.
