Тараздық 400-ге жуық ата-ана бір жапырақ қағаз алу үшін жанталасып, мекеме алдында сабылуға мәжбүр, деп хабарлайды inbusiness.kz тілшісі.
Көпшілік тіпті таңғы 4-5-тен кезекке тұрған. Ел "5G" енген тұста кезек тосып, табанынан таусылғанына күйінеді. Өйткені бәріне себеп - электронды портал екен.
Ата-аналар бөбекжайға қажет жолдаманы ала алмай әлек. Таңнан бері қалалық білім бөлімінің кіреберісінде кептеліс.
"Күні бойы осында тұрмыз. Таңнан бері. Кезек ұстай алмай тұрмыз. Мен 2 жыл бойы кезекке қол жеткізе алмай келемін. Былтыр жыл бойы жүгірдім. Орын жоқ! Неге бәрін электронды қылмайды?", - дейді қала тұрғыны Анна Сычова.
Бұқара электронды кезек деген аты ғана,- дейді. Өйткені онлайн арқылы тіркеу жеңіл болғанымен, жолдаманы алу қағаз жүзінде екен. Сондықтан есік қағып, сағаттап кезек күтуге мәжбүр. Ал үйтіп-бүйтіп жолдаманы әрең аларыңда артынан орын жоқ,- деп күйдіреді екен.
Жұрт үшін бұл жыл сайынғы құбылыс. Мемлекеттік балабақша болмаса, жекеге барып, қалта қақпақ. Қазір қалада мемлекеттік типтегі 45 балабақша бар. Тұрғындар мекемеде орын бар-жоғын айтуда ашықтық жоғын айтады. Ал қалалық білім бөлімі орын тапшылығы барын жасырмады. Бұған әуелгі себеп ел санының еселенуі.
