Биылғы жылдың 1 желтоқсанына дейін Бірыңғай жинақтаушы зейнетақы қорындағы азаматтардың зейнетақы жинақтары 13,4 трлн теңгеге жетті, деп хабарлайды inbusiness.kz тілшісі ranking.kz-ке сілтеме жасап.
Бір жыл ішінде жинақ сомасы 5%-ға немесе 648,8 млрд теңгеге өсті. Айта кету керек: азаматтардың зейнетақы жинақтары тұрғын үй сатып алуға және денсаулығын жақсартуға жинақ ақшасының бір бөлігін жұмсауларына қарамастан өсіп келеді.
Зейнетақы жинақтары екі факторға байланысты артуда. Біріншісі – салымшылардың зейнетақы қорына аударатын жарналары көлемін ұлғайту, екіншісі – инвестициялық кіріс.
Мәселен, биылғы он бір айдың қорытындысы бойынша өткен жылдардың осы кезеңінде азаматтардың зейнетақы жарналары алғаш рет 1 трлн теңгеден асып, абсолютті рекордтық көрсеткішке жетті. Бір жыл ішінде жарна сомасының өсу қарқыны 24%-ды құрады, бұл соңғы үш жылдағы ең жоғары көрсеткіш. Зейнетақы жарналары көлемінің ұлғаюы барлық облыстарда байқалады. Мәселен, биылғы жылдың он бір айында міндетті зейнетақы жарналары (МЗЖ) бойынша 1,1 трлн теңге түсті (бір жылдағы өсім 24%-ды құрады). Міндетті кәсіптік зейнетақы жарналары (МЗЖ) 50,4 млрд теңге түсті (бір жылда 18%-ға өсті). Сондай-ақ ерікті зейнетақы жарналарының (ЖЗЖ) көлемінің де айтарлықтай өсуі байқалады – бірден жылына 38%-ға, 660 млн теңгеге дейін.
Салымшылардың өздерінің жарналарынан басқа, 2021 жылғы 1 қаңтардан 1 желтоқсанға дейін 1,3 трлн теңгеден асатын таза инвестициялық кірістің арқасында зейнетақы жинақтарының айтарлықтай өсуі қамтамасыз етілді. Бұл өткен жылмен салыстырғанда 210 млрд теңгеге (немесе 19%-ға) артық.
ҚР Ұлттық Банкінің басқаруындағы БЖЗҚ активтерінің кірістілігі жыл басынан бері инфляция 7,8% болғанда 11,0%-ды құрады. Бұл ретте соңғы он екі айдағы рентабельділік осы кезеңдегі инфляция 8,7% болғанда 11,77%-ды құрады.
Құралай Құдайберген
