Көлік вице-министрі Талғат Ластаев Сенат кулуарында Әлия Молдағұлова атындағы халықаралық әуежайдың жұмысына қатысты түсінік берді, деп хабарлайды inbusiness.kz сайты.
"Бұл жағдайдан (ред. – ұшу-қону жолағын су басып қалу) кейін авиация әкімшілігінің маманын, сарапшысын, инспекторын Ақтөбе жібердік. Бұл сарапшылар (әуежайдың) ұшу-қону жолағына талдау жүргізді. Оған айтарлықтай зақым келмеген, стандарттар мен талаптарға сәйкес еместігі анықталмады. Сәйкесінше әуежай жұмысын қайта жалғастырды", - деді вице-министр тілшілердің сауалына берген жауабында.
Журналистер "Демек жөндеу жұмыстары жүргізілмей ме?" деп нақтылады.
"Жоқ", - қысқа қайырды спикер.
Айта кету керек, осыған дейін су тасқыны салдарынан Ақтөбе әуежайы жұмысын тоқтатқанын жазған болатынбыз. Кейіннен әуежай жұмысын қайта жандандырғаны хабарланды.
