13 сәуірде Татарстанның Жоғарғы Соты Қазан қаласының тұрғыны Ильназ Галявиевке өмір бойына бас бостандығынан айыру жазасын тағайындады. Ол №175 гимназияның жеті оқушысы мен екі мұғаліміне қарулы шабуыл жасап өлтірді, деп хабарлайды inbusiness.kz "Интерфакс" агенттігіне сілтеме жасап.
"Сот Ильназ Галявиевті кінәлі деп тануға және өмір бойына бас бостандығынан айыру жазасын тағайындауға үкім шығарды", - деді судья үкімді оқып.
Оған қоса сотталушыға 200 мың рубль айыппұл тағайындалды.
Сот сотталушыны Ресей Федерациясының Қылмыстық кодексінің 105-бабының 2-бөлігі (кісі өлтіру), 105-бабының 2-бөлігі 3-баптың 30-тармағы (кісі өлтіруге оқталу), Ресей Федерациясының Қылмыстық кодексінің 222.1-бабының 1-бөлігі (жарылғыш заттарды немесе жарылғыш құралдарды заңсыз сатып алу, беру, өткізу, сақтау, тасымалдау, жөнелту немесе алып жүру), 223.1-бабының 1-бөлігі (жарылғыш заттарды заңсыз өндіру, жарылғыш құрылғыларды заңсыз жасау, қайта өңдеу немесе жөндеу), 167-бабының 2-бөлігі бойынша (мүлікті қасақана жою немесе бүлдіру) бойынша кінәлі деп таныды.
Бұған дейін мемлекеттік айыптаушы Галявиевті кінәлі деп тануды және оған алғашқы 5 жылын түрмеде өтеумен өмір бойына бас бостандығынан айыру жазасын тағайындауды сұрағаны туралы хабарланған болатын.
Адвокат өз кезегінде сотталушыны қылмыстық жауапкершіліктен босатып, емдеуге жіберуді сұрады.
Қазан гимназиясында қайғылы оқиға 2021 жылдың 11 мамырында болды. 19 жастағы Галявиев аңшылыққа арналған мылтықпен, сондай-ақ өзі жасаған жарылғыш құрылғымен қаруланып, бұрын оқыған №175 гимназияның мұғалімдері мен оқушыларына шабуыл жасады. Нәтижесінде тоғыз адам, оның ішінде жеті кәмелетке толмаған бала қайтыс болды.
Галявиев тергеу кезінде және сотта өзінің кінәсін толық мойындады.
