Үндістан Президенті Рам Нат Ковинд өз құттықтауында мемлекеттер арасындағы өзара байланыстардың тарихи арқауы берік екенін атап өтіп, Қазақстанның өсіп-өркендей беруіне ниеттестік танытқан, деп хабарлайды Ақорданың баспасөз қызметі.
"Үндістан мен Қазақстан арасындағы қарым-қатынастар ғасырлар бойы жалғасып келе жатқан тарихи және мәдени байланыстарға негізделген. Екі ел арасындағы көпжақты және екіжақты қатынастар стратегиялық серіктестікке ұласты. Ынтымақтастығымыз одан әрі нығая түсетініне сенімдімін", – делінген құттықтау хатта.
Испания Королі Фелипе өз құттықтау хатында испан халқы мен Үкіметінің атынан Қасым-Жомарт Тоқаевты Тәуелсіздік күнімен құттықтап, достас Қазақстан жұртына бейбітшілік және бақ-береке тіледі.
Сингапур Республикасының Президенті Халима Якоб Қасым-Жомарт Тоқаевты және Қазақстан халқын Тәуелсіздік күнімен құттықтады.
"Сингапур мен Қазақстан арасында жақсы достық қарым-қатынас орнаған. Екі елдің ортасындағы тауар айналымы ұлғайып, құқық және қаржы салаларындағы ынтымақтастықтың нығайып келе жатқанына қуаныштымын. Халықтарымыздың игілігі үшін Өзіңізбен бірлесіп жұмыс істеуге және байланыстарымызды одан әрі арттыра түсуге ниеттіміз", – деп жазған Халима Якоб.
Тәуелсіздік күнімен құттықтап, бақ-береке тілеген жеделхат Австрия Президенті Александр Ван дер Белленнен де келіп түсті.
"Екі ел арасындағы барлық сала бойынша қарқынды дамып келе жатқан ықпалдастықты, оның ішінде, экономикалық ынтымақтастықты табысты дамыта береміз деп сенемін", – делінген жеделхатта.
Австралия Одағының Генерал-Губернаторы Дэвид Херли өз құттықтау хатында мемлекеттер арасындағы екіжақты достық қатынастардың одан әрі дами беретініне сенім білдірген.
