Бұл туралы Президент Ауыл шаруашылығы қызметкерлерінің бірінші форумында айтты, деп хабарлайды inbusiness.kz сайты.
"Агроөнеркәсіп кешенін индустрияландыруды белсенді түрде жалғастыру қажет" деген мемлекет басшысы бірқатар жобаны бастағанын жеткізді.
– Былтырғы Жолдауда үш жылдың ішінде агроөнеркәсіп кешеніндегі қайта өңделген өнімнің үлесін 70 пайызға дейін арттыру міндетін қойдым. Біз негізгі азық-түлік тауарлары бойынша импортқа тәуелділікті азайтуға бағытталған бірқатар жобаны жүзеге асыра бастадық. Атап айтқанда, таяу жылдары сүт өндіру көлемін 600 мың тоннаға көбейтуге мүмкіндік беретін 116 заманауи тауарлы сүт фермасы салынады, – деді Қасым-Жомарт Тоқаев.
Елімізде жалпы қуаты жылына 220 мың тонна құс етін өндіретін 29 фабрика, сондай-ақ жылына 850 миллион жұмыртқа өндіретін 11 құс фабрикасын пайдалануға беру көзделіп отыр.
– 100 мыңға жуық ірі қараға арналған 6 бордақылау алаңын, сондай-ақ 50 мың бас уақ малға арналған бордақылау кешенін іске қосу жоспарланып отыр.
Сонымен қатар, Үкімет алғашқы мамандандырылған биржа ашуды қолға алды. Бұл кешенде мал саудасының заманауи ережелері сақталып, фермерлер мен тұтынушылар арасында басы артық делдалдар болмайды, – деп атап өтті Президент.
