"Таза Қазақстан" республикалық экологиялық акциясы жалғасып жатыр. Бүгін Астана қаласы Дін істері жөніндегі басқармасының ұйымдастыруымен қаладағы орталық зиратқа тазалық жұмыстары жүргізілді, деп хабарлайды inbusiness.kz сайтының тілшісі.
"Өткенге құрмет - тіріге міндет" тақырыбында өткен игі шараға қала мешіттерінің имамдары мен белсенділер қатысты.
Жаңа зират Астанадан 20 шақырым жерде орналасқан. 460 гектар аумақты алып жатыр. 80-ге жуық жамағат акцияға белсене атсалысуда.
- Акция аясында зираттың маңындағы құрылыс қалдықтарын тазарттық. Барлығы белсене қатысып жатыр, - дейді Астана қаласының Дін істері жөніндегі басқарма басшысы Қайролла Көшқали.
Тазалық діннің басты талабы. Сондықтан бүгінгі шараның маңызы зор.
- Қазақи тәрбие мен имани тәрбиеге мән беретін болсақ, тазалық ол иманнан. Ертеде бабаларымыз үйінің маңайын тазалап, тазалыққа қараған. Соның көрінісі бүгін осында жалғасын тауып жатыр, - дейді республикалық Әзірет Сұлтан мешітінің бас имамы Ерболат Жүсіпов.
