Шу аудандық соты теміржолда төрт қызметкердің қаза болуына әкеп соққан оқиғаға қатысты үкім шығарды, деп хабарлайды inbusiness.kz сайты.
Қайғылы жағдай 2025 жылғы 10 желтоқсанда "Шешенқара – Қаражыңғыл" аралығында болған. Жүк пойызы теміржолды жөндеу жұмыстарын жүргізіп жатқан бригаданы басып кеткен.
Сот мәліметінше, жұмыстар теміржол учаскесін жабусыз және қажетті қауіпсіздік шараларын сақтамай жүргізілген. Сонымен қатар пойыз машинисіне жолда жұмысшылардың жүргені туралы дер кезінде хабарланбаған.
Оқиға салдарынан төрт қызметкер қаза тауып, тағы екі адам жарақат алды.
2026 жылғы 9 шілдедегі сот үкімімен пойыз диспетчері 5 жылға бас бостандығынан айырылды. Сарышаған жол дистанциясының екі қызметкеріне 3 жыл 6 айға бас бостандығын шектеу жазасы тағайындалды.
Сондай-ақ сот үшеуіне де теміржол көлігіндегі қозғалыс қауіпсіздігін қамтамасыз етуге байланысты қызметпен айналысуға тыйым салды.
Іс бойынша мемлекеттік айыптауды көлік прокуратурасы қолдады.
Үкім заңды күшіне енген жоқ.
